कोल्हापूर: कोल्हापूर पोलिसांच्या परदेशी नागरिक नोंदणी शाखेने (FRO) मोठी कारवाई करत भारतात बेकायदेशीरपणे वास्तव्यास असलेल्या कांगो देशाच्या नागरिकाला मायदेशी हद्दपार केले आहे. ॲडेलिन कात्शोको त्सिबांफुमू असे या परदेशी नागरिकाचे नाव आहे.

कांगोचा नागरिक ॲडेलिन हा हातकणंगले पोलीस ठाण्याच्या हद्दीतील एका खाजगी शिक्षण संस्थेत आला होता. दरम्यान, संबंधित संस्थेने परदेशी नागरिक नोंदणी शाखेकडे याची माहिती दिली. एफआरओ शाखेने तपासणी केली असता, त्यांच्या व्हिसाची मुदत ७ जानेवारी २०२५ रोजीच संपल्याचे समोर आले. ८ जानेवारी २०२५ पासून तो भारतात बेकायदेशीरपणे राहत होता.

या नागरिकाबाबत अधिक तपास केला असता, बेंगळुरू येथील कोथनूर पोलीस ठाण्यातही त्याच्यावर 'मुदतबाह्य वास्तव्य' केल्याप्रकरणी गुन्हा दाखल असल्याचे निष्पन्न झाले. बेंगळुरूच्या मेयो हॉल न्यायालयात ३ जुलै रोजी सुनावणी होती. कोल्हापूरचे पोलीस अधीक्षक नीलोत्पल यांच्या मार्गदर्शनाखाली, पोलिसांनी २ जुलै रोजी रात्री त्याला कोल्हापूर ते बेंगळुरू नेले. न्यायालयाच्या आदेशानुसार त्याला ४ हजार रुपयांचा दंड ठोठावण्यात आला आणि त्याला तातडीने हद्दपार करण्याचे निर्देश देण्यात आले.

न्यायालयाचे आदेश मिळताच, पोलिसांनी ४ जुलै रोजी सकाळी ७ वाजता त्याला छत्रपती शिवाजी महाराज आंतरराष्ट्रीय विमानतळ, मुंबई येथे पोहोचवले. तेथून ११.०५ वाजताच्या विमानाने त्याला त्याच्या मायदेशी (कांगो) रवाना करण्यात आले.

या कारवाईत एफआरओ शाखेचे उपनिरीक्षक राजेंद्र सोनसुरकर, पोलीस हवालदार दीपक ढंग, अनिरुद्ध केसरकर तसेच हातकणंगले पोलीस ठाण्याचे निरीक्षक सचिन सूर्यवंशी, मदन मधाळे, शंतनू देसाई, विकी भंडारे आणि चालक सागर कदम, आकाश गायकवाड, गणेश दंदाले यांनी मोलाची भूमिका बजावली.