कोल्हापूर  : महानगरपालिकेच्या विभागीय कार्यालय क्र.4 छ.ताराराणी मार्केट व अतिक्रमण निर्मूलन पथकामार्फत आज तावडे हॉटेल ते कावळा नाका चौक या मुख्य रस्यावर धडक कारवाई करत अनधिकृत साहित्यांवर आज कारवाई करण्यात आली. 

या कारवाईमध्ये 3 लोखंडी हातगाडी, 4 ॲगंल बोर्ड, 6 स्टॅण्डबोर्ड, 23 कॅरेट, 5 खुर्ची, 1 एलईडी स्क्रिन व इतर साहित्य जप्त करण्यात आले.

महानगरपालिकेच्या ठराव क्र.83, दि. 18 मे 2026 नुसार अतिक्रमण कारवाईदरम्यान जप्त करण्यात आलेले अनधिकृत साहित्य संबंधित व्यवसायधारकांना परत न देण्याचा निर्णय घेण्यात आला असून आज जप्त करण्यात आलेले साहित्य कायमस्वरूपी जप्त करण्यात आले आहे.

ही कारवाई आयुक्त डॉ.राजेंद्र भारुड यांच्या आदेशानुसार करण्यात आली. आजची मोहिम उपआयुक्त किरणकुमार धनवाडे यांच्या मार्गदर्शनाखाली राबविण्यात आली. 

या कारवाईमध्ये सहा.आयुक्त डॉ.विजय पाटील, कनिष्ठ अभियंता उमेश बागूल, अतिक्रमण प्रमुख प्रफुल्ल कांबळे, कनिष्ठ लिपीक सजन नागलोत तसेच अतिक्रमण व विभागीय कार्यालय क्र. 4 कडील कर्मचाऱ्यांनी सहभाग घेतला.

महापालिकेच्या अतिक्रमण विभागाने शहरातील अनधिकृत फेरीवाले, व्यवसायधारक तसेच रस्त्यांवर उभारण्यात आलेल्या अनधिकृत शेड्स व अतिक्रमणांविरोधातील कारवाई यापुढेही अधिक तीव्र करण्यात येणार आहे. तरी संबंधितांनी आपले अतिक्रमण त्वरित स्वतःहून हटवावे, अन्यथा जप्त करण्यात आलेले साहित्य परत दिले जाणार नाही, असे आवाहन महापालिकेच्यावतीने करण्यात आले आहे.