कोल्हापूर : सरनोबतवाडी (ता. करवीर) येथे घरात कोणी नसलेचे पाहून बंद घराचा कडी-कोयंडा उघडून चोरी करणाऱ्या चोरट्यास कोल्हापूर स्थानिक गुन्हे अन्वेषण शाखेने (LCB) अटक केली आहे. यश संतोष जाधव (वय २०, रा. सरनोबतवाडी) असे अटक करण्यात आलेल्या आरोपीचे नाव आहे. त्याच्याकडून चोरी केलेली सोन्याची माळ आणि रोख रकमेसह एकूण २ लाख २० हजार रुपये किमतीचा मुद्देमाल जप्त करण्यात आला आहे.

दिनांक २६ जून ते ३ जुलै २०२६ या कालावधीत रेणुका मंदिर जवळ, सरनोबतवाडी येथील फिर्यादीच्या घराचा दरवाजा कडी-कोयंडा न लावता ओढून घेतलेला होता. ही संधी साधून अज्ञात चोरट्याने घरात प्रवेश केला आणि घरातील सोन्याची तीन पदरी माळ व रोख रक्कम चोरून नेली होती. याप्रकरणी गांधीनगर पोलीस ठाण्यात गुन्हा दाखल करण्यात आला होता.

हा गुन्हा उघडकीस आणण्यासाठी पोलीस अधीक्षक नीलोत्पल यांनी स्थानिक गुन्हे अन्वेषण शाखेचे पोलीस निरीक्षक सुशांत चव्हाण यांना सूचना दिल्या होत्या. तपासादरम्यान पोलीस उपनिरीक्षक जालिंदर जाधव आणि त्यांच्या पथकाला मिळालेल्या गोपनीय माहितीनुसार, यश जाधव याला सरनोबतवाडी टोल नाक्याजवळ सापळा रचून ताब्यात घेण्यात आले. चौकशीत त्याने गुन्ह्याची कबुली दिली असून, पोलिसांनी त्याच्याकडून ३२ ग्रॅम वजनाची सोन्याची माळ आणि रोख रक्कम जप्त केली आहे.
सदरची कारवाई पोलीस अधीक्षक नीलोत्पल, अप्पर पोलीस अधीक्षक आण्णासाहेब जाधव आणि करवीरचे उपविभागीय पोलीस अधिकारी आप्पासाहेब पवार यांच्या मार्गदर्शनाखाली पोलीस निरीक्षक सुशांत चव्हाण, उपनिरीक्षक जालिंदर जाधव आणि स्थानिक गुन्हे अन्वेषण शाखेच्या पथकाने केली आहे.