कोल्हापूर : नेसरी पोलीस ठाण्याच्या हद्दीत जनावरांना चरण्यासाठी गेलेल्या एका वृद्ध महिलेला चाकूचा धाक दाखवून सोन्याचे दागिने लुटणाऱ्या अट्टल गुन्हेगाराला कोल्हापूर स्थानिक गुन्हे अन्वेषण शाखेने जेरबंद केले आहे. या कारवाईत पोलिसांनी १४ ग्रॅम वजनाचे सोन्याचे दागिने आणि मोटारसायकल असा एकूण २ लाख ६० हजार रुपयांचा मुद्देमाल जप्त केला असून, या आरोपीकडून दोन गंभीर गुन्हे उघडकीस आले आहेत.

​ २८ सप्टेंबर २०२६ रोजी दुपारी घडलेल्या या घटनेत आरोपीने वृद्ध महिलेच्या गळ्यातील आणि कानातील सोन्याचे दागिने बळचोरीने लुटून पोबारा केला होता. याप्रकरणी नेसरी पोलीस ठाण्यात गुन्हा दाखल होता.
​तपास व कारवाई: पोलीस अधीक्षक  नीलोत्पल यांच्या मार्गदर्शनाखाली स्थानिक गुन्हे अन्वेषण शाखेचे पोलीस निरीक्षक सुशांत चव्हाण व त्यांच्या पथकाने तांत्रिक विश्लेषण आणि सीसीटीव्ही फुटेजच्या आधारे तपास करत संशयित आरोपी बाळू कर्लेकर (रा. संतीबस्तवाड, ता. जि. बेळगाव) यास सापळा रचून ताब्यात घेतले.

​ कसून चौकशी केली असता त्याने नेसरी परिसरातील दरोड्याची कबुली दिलीच, शिवाय पंढरपूर शहर पोलीस ठाण्याच्या हद्दीतूनही मोटारसायकल चोरी केल्याची कबुली दिली.
​सध्या आरोपी व जप्त केलेला मुद्देमाल पुढील कायदेशीर कारवाईसाठी नेसरी पोलिसांच्या ताब्यात देण्यात आला आहे.