कोल्हापूर महानगरपालिकेच्या अतिक्रमण निर्मूलन पथकाने आज गुरुवारी तटाकडील तालीम चौक ते महाद्वार रोड परिसरात धडक कारवाई करत अनधिकृत विक्रेते आणि दुकानदारांना जोरदार दणका दिला. शहरातील वाहतुकीला अडथळा ठरणारी आणि रस्त्यावर पसरलेली अतिक्रमणे हटवण्यासाठी पालिकेने हे आक्रमक पाऊल उचलले आहे.

विभागीय कार्यालय क्रमांक २ आणि अतिक्रमण विभागाच्या वतीने करण्यात आलेल्या या संयुक्त कारवाईत मोठ्या प्रमाणात साहित्य जप्त करण्यात आले. यामध्ये १५ लाकडी टेबल, ११ पार्किंग जाळ्या, २० लोखंडी पाईप, ६ पुतळे, लोखंडी कॉट, छत्र्या, स्टॅन्ड बोर्ड, स्पीकर आणि रांगोळी बॅग यांसह इतर अनेक साहित्याचा समावेश आहे. महाद्वार रोड आणि ताराबाई रोड यांसारख्या गजबजलेल्या भागात ही कारवाई झाल्याने अनधिकृतपणे रस्ते व्यापणाऱ्या व्यावसायिकांचे धाबे दणाणले आहेत.

महापौर रूपाराणी निकम आणि वरिष्ठ अधिकाऱ्यांच्या मार्गदर्शनाखाली पार पडलेल्या या मोहिमेत अतिक्रमण विभागाचे कर्मचारी आणि अधिकारी मोठ्या संख्येने सहभागी झाले होते. आगामी काळात शहरातील अनधिकृत फेरीवाले आणि दुकानांच्या बाहेर काढलेल्या शेड्सवर आणखी तीव्र स्वरूपाची कारवाई केली जाईल, असा इशारा प्रशासनाने दिला आहे. दुकानदारांनी आपली अतिक्रमणे स्वतःहून काढून घ्यावीत, अन्यथा जप्तीची कारवाई सुरूच राहील, असे पालिकेच्या वतीने स्पष्ट करण्यात आले आहे.