🟣 कोल्हापुरात १५९ बुद्धिबळपटूंचा तुफान प्रतिसाद; पहिल्या ३ फेऱ्यांनंतर रंगत वाढली

कोल्हापूर  :
महालक्ष्मी मंदिर परिसरातील विद्यापीठ हायस्कूलमध्ये रविवारी (१८ ऑक्टोबर) दसरा महोत्सवा निमित्त आयोजित शालेय जलद बुद्धिबळ स्पर्धेत रोमांचक सामने पाहायला मिळत आहेत. तिसऱ्या फेरीअखेर ३ गुणांची कमाई करत राजवर्धन मोरे, हर्ष कांबळे, हर्ष मडनाईक आणि अमेय करवेकर यांनी आपापल्या गटात दिमाखदार आघाडी घेतली आहे.

अनुज् चेस अकॅडमी आणि इचलकरंजी चेस अकॅडमी यांच्या संयुक्त विद्यमाने या स्पर्धेचे आयोजन करण्यात आले आहे. स्पर्धेचे उद्घाटन रयत गुरुकुल पब्लिक स्कूल, कुंभोजच्या प्रिन्सिपल  तेजस्विनी आडनाईक आणि व्हर्टिकल कंपलाईन्स प्रा. लि. गोवाच्या मॅनेजिंग डायरेक्टर  विश्वत्ता राउत-देसाई यांच्या हस्ते दीपप्रज्वलन करून उत्साहात झाले.

या प्रसंगी कोल्हापूर जिल्हा बुद्धिबळ संघटनेचे माजी सचिव  कृष्णात पाटील, इचलकरंजी चेस अकॅडमीचे मुख्य पंच  शैलेश होनकट्टी, तसेच अनुज् चेस अकॅडमीचे अनुराग पाटील आदी मान्यवर आणि पंचप्रमुख उपस्थित होते.

◼️१५९ खेळाडूंचा उस्फूर्त सहभाग
इयत्ता पहिली ते आठवी अशा एकूण आठ स्वतंत्र गटांमध्ये ही स्पर्धा खेळवली जात आहे. यामध्ये कोल्हापूर आणि परिसरातील तब्बल १५९ बाल-बुद्धिबळपटूंनी अत्यंत उस्फूर्त सहभाग नोंदवला असून, मुलांमध्ये खेळाचा मोठा उत्साह दिसून येत आहे.
तिसऱ्या फेरीनंतर स्पर्धा अतिशय चुरशीची बनली असून, अंतिम फेरीत बाजी मारण्यासाठी चिमुकल्या खेळाडूंमध्ये जोरदार टक्कर पाहायला मिळणार आहे.